Ke Kaha Kiʻi Hale o ka Hale Hawai'i
Na Clinton Ripley lāua 'o Charles Dickey i kaha ki'i i ke ki'i no ke kūkulu 'ana i ka Hale Hawai'i ma ka Hale Hō'ike'ike ʻo Bīhopa i ka makahiki 'umikumamāwalu kanaiwakumamāiwa. Ua kūkulu 'ia ka Hale Hawai'i ma ke ʻano o ke kaila hale o ka po'e Roma, a 'o ka ho'olilo no ke kūkulu hou 'ana i nei hale he kanaonokumamālua kaukani kālā a mai ka waihona kālā mai a Charles Reed Bishop, ka mea nāna i ho'okumu i ka hale hōʻikeʻike. I ka hemo 'ana o ka Hale Hawai'i i ka makahiki 'umikumamāiwa me ʻekolu, 'a'ole i ho'okomo 'ia ka uila i loko o ka hale. Eia na'e, ua hana 'ia kekahi mau pukaaniani a me ka pukaaniani kaupoku o ka hale i mea e komo mai ai ka mā'ama'ama lā i loko o ka hale. Ma muli o ka pau 'ana o ka pono o nā mea makamae i ka mā'ama'ama o ka lā, ua pani 'ia a pa'a loa ua pukaaniani kaupoku ala i nā makahiki 'umikūmāmāiwa kanaono no ka mālama pono 'ana i nā mea makamae. Ua ho'oponopono hou 'ia ka pilikia o ua pukaaniani kaupoku ala e Glenn Mason Architects ma ka hoʻoponopono hou ʻana i ka Hale Hawaiʻi, a pau i ka hoʻoponopono ʻia i ka makahiki 'elua kaukani me ʻeiwa.
'O nā pahu hō'ike'ike ma nā papahele 'ekolu a pau o ka Hale Hawai'i, ua hana 'ia me ka lā'au koa Hawai'i a ua kūkulu 'ia kēia mau pahu hō'ike'ike ma Stillwater, Minnesota. 'O kēia mau pahu hō'ike'ike, ua hana lima 'ia i kū i ke kaila o kēia mua aku a loa'a nō nā laka i hiki ke laka 'ia a pa'a pono i hiki 'ole i ke 'ea ke komo i loko o ka pahu. Ua pipi'i nō ka hana 'ana i kēlā mau pahu hō'ike'ike no ka mea, ʻoi loa aku ka pipiʻi o nā pahu hōʻikeʻike ma mua o ka hapa o ke kumukū'ai i ho'olilo 'ia no ka hoʻoponopono hou 'ana i ka Hale Hawai'i.
ʻO nā pou a me nā hūlili ma nā papahele a pau, ua hana 'ia me nā ki'i mea kanu Hawai'i. Ma ka wēlau o ka pou o ka papahele mua, he ki'i o ka lau maile me nā hua kukui a me nā lau kukui. 'O nā hua kukui, 'o ia nō ka mea i hō'ā 'ia no ka ho'omā'ama'ama 'ana. 'O ka wēlau o ka pou ma ka papahele 'elua, he ki'i o ke kapa a me ka 'ulu. 'O ka hūlili, ua kālai 'ia ke ki'i o ka sila aupuni Hawai'i. 'O ka hūlili o ka papahele 'ekolu, he ki'i o ke kalo. 'O ka mana'o nui o ke kalo, 'o ke kalo ʻo ia ke keiki hānau mua a nā akua Hawai'i a 'o ia hoʻi ke kaikua'ana o ka po'e Hawai'i.
Ua ho'omau 'ia nā ki'i Hawai'i i kālai 'ia i ka pipi'o ma nā paia kokoke i ka huna. ʻO ke ki'i i kālai 'ia ma luna o ka pipi'o, he ki'i i hana kope 'ia mai ka hale hō'ike'ike nona ka inoa ʻo Kālaipāhoa, he akua kiʻi hoʻomāunauna.
'Oiai, ua ho'ohālikelike 'ia ke kaila o ke kūkulu ʻana i ka Hale Hawai'i i ke au o ka wā Wikolia o ke kenekulia 'umikumamāiwa, a 'o nā mea o loko o kēia hale, he mau mea nō ia e pa'a ai ko Hawai'i nei kūlana hale a me nā loina kahiko.