Ke Kiʻi o Kamehameha I
I ka makahiki ʻumikumamāwalu ʻumikumamālima, hoʻomaka ʻo Louis Choris, he kanaka kaha kiʻi, i kāna huakaʻi holo moana ma Oceania ma luna o ka moku Lukia ʻo Rurik i kāpena ʻia e ka Lukānela ʻo Otto von Kotzebue, i mea e palapala ai i ke ala ma ka moana ʻĀlika. He luhi ka hopena o ia holo moana lōʻihi ʻana a hiki mai i Hawaiʻi nei. ʻAʻohe o lākou ʻike, ma mua iki o kā lākou hiki ʻana mai i Hawaiʻi nei, ʻakahi a hoʻāʻo mai ʻo Georg Anton Schaffer, he Kelemānia e hōʻoia ana i kona ʻano kūlana he ʻelele no ka mōʻī o Lukia, e lilo ka pae ʻāina ʻo Hawaiʻi iā ia.
I ka lā iwakāluakumamāhā o ka mahina ʻo Nowemapa, i ka makahiki ʻumikumamāwalu ʻumikumamāono, ua hui a launa pū ʻo Kamehameha ʻEkahi i ka poʻe hoʻokele moku o ka Rurik. ʻO ke ʻano o ko Kamehameha lole i ia wā i kēia launa ʻana, ʻo ia hoʻi he malo me kekahi ʻano kapa e uhi ana i kona mau poʻohiwi. Ma muli o ko Kamehameha ʻano he kūpaʻa a he ʻoluʻolu nō hoʻi, nonoi akula ʻo Choris iā Kamehameha no kāna ʻae e pena ʻia kona kiʻi. No kēia pena ʻana, ua hoʻololi ʻo Kamehameha i kona lole a komo ʻo ia i ke kuka ʻulaʻula a me ka pālule keʻokeʻo o kekahi sela moku kūlana kanaka maʻamau me ka manaʻo e hōʻike ʻole aku i kona aloha i kekahi o nā mana aupuni o ke ao.
Ua pena ʻo Choris i kekahi mau kiʻi wai hoʻoluʻu o Kamehameha ʻEkahi i ia lā. Aia nō kekahi o ia mau kiʻi ma ka waihona palapala kahiko o ka Hale Hōʻikeʻike ʻo Bīhopa. Ua hiki aku nō hoʻi kekahi kiʻi hou aku i ko ʻĀsia kapa kai, ma laila i komo aku ai nō hoʻi ia kiʻi i ka hana kālepa paʻa me ko nā ʻāina o ke komohana. I ia manawa, kaulana nā ʻano kiʻi pena ʻaila ʻia me ke kaila o nā pena kaha kiʻi o ko Kina, ma ʻEuropa me ʻAmelika Hui Pū ʻIa kekahi. ʻO nā kiʻi o Kamehameha ʻEkahi i pena ʻaila ʻia, e like hoʻi me kēia kiʻi, ua ʻae ʻia ke kūʻai ʻia o ia mau kiʻi ma Manila mai ka makahiki ʻumikumamāwaluʻ umikumamāhiku. Ua loaʻa mai kekahi o ia mau kiʻi pena ʻaila ʻia i ka Hale Hōʻikeʻike ʻo Boston Athenaeum i ka makahiki ʻumikumamāwalu ʻumikumamāwalu, ʻelua wale nō makahiki ma hope o ka pena ʻana o Choris i ia mau kiʻi.