Nā Paʻa Kāhili Mua - Kaolohaka
Ua hō'ike 'ia he mau ho'ailona e 'ike 'ia ai ke kūlana ali'i a me kā lākou hana ma ke kaiaulu. ʻO kekahi o kēia mau ho'ailona, 'o ia nō nā 'ahu'ula, nā mahiole, nā lei niho palaoa, nā lei niho 'elepani, nā lei hulu, a me nā kāhili. Ma Hawai'i nei, 'o ka ho'ailona o ke kāhili, 'o ia nō kekahi mea e hō'ike ai i ka lehulehu i kekahi ali'i. I ka wā kahiko, ho'ohana 'ia ke kāhili no kekahi hanana Hawai'i, kekahi wahi a i 'ole ia no ka ho'ohanohano 'ana i kekahi mau kānaka'ano nui. I kēia mau lā na'e, ke makana 'ia ke kāhili i kekahi kanaka, he mea ia e hoʻohālike ʻia nā kānaka i hāʻawi ʻia i ke kāhili me kekahi mau aliʻi, no lākou ke kūlana hanohano loa.
'O Kaolohaka kekahi inoa i kapa 'ia i ia mau paʻa kāhili. Ua ho'ohana 'ia ua mau kāhili ala no ka ho'olewa o ka Mō'ī Wahine Lili'uokalani ma ka lā ʻumikumamāwalu o Nowemapa i ka makahiki 'umikumamāiwa ʻumikumamāhiku, a ma ka hoʻolewa o ke Kamali'ikāne Jonah Kūhiō ma ka lā 'umikumamālima o Ianuali i ka makahiki 'umikumamāiwa iwakāluakumamālua. Ua ho'ohiki ka Mō'ī Wahine Lili'uokalani i kēia mau kāhili a me ka nui o kona mau waiwai a pau no ka Hale Hō'ike'ike ʻo Bīhopa ma hope o kona hala 'ana.
ʻO nā hulu i haku 'ia no kēia mau kāhili, mai nā hulu manu o nā manu 'i'iwi a me nā manu 'ō'ō, no lākou nā hulu 'ula'ula a me ka melemele. Ua nāki'i pākahi 'ia nā 'ope hulu a pau, a laila nāki'i 'ia ma ka pou papa. A ho'onaninani 'ia ka pou e pa'a ai i ka lima me nā iwi honu a me nā niho 'elepani.