Ke Kula Pepeiao o Pauahi
No Ke Kamāliʻi Wahine ʻo Pauahi Bishop, ka moʻopuna kuakahi a Kamehameha ʻEkahi, nei kula pepeiao pōhaku makamae aʻiaʻi me ke kaimana i kālai ʻia. Na Ke Kamāliʻi Kāne ʻo Lot Kapuāiwa i makana aku i ia mau kula pepeiao iā Pauahi. ʻO ia Kapuāiwa ka i lilo i mōʻī kāne no Hawaiʻi nei, ʻo ia hoʻi, ʻo Kamehameha ʻElima. Ua hoʻopalau ʻia akula ʻo Lot iā Pauahi i ko lāua wā kamaliʻi, akā ʻaʻole nō lāua i male i kekahi i kekahi. Ua male akula ʻo Pauahi iā Charles Reed Bishop i ka makahiki ʻumikumamāwalu kanalima.
Hoʻokahi makahiki ma mua mai, huakaʻi hele akula ʻo Lot i ʻEuropa me kona kaikuaʻana ʻo Alexander Liholiho me ko lāua kahu hānai ʻo Dr. Gerrit Judd. ʻO ia Judd ke kuhina o nā ʻāina ʻē no Kamehameha ʻEkolu. Ma hope o ke kipa mua ʻana aku i nā awa kū moku o San Francisco, Panama, Jamaica me Wakinekona DēCē, hōʻea akula lākou i ʻEuropa i ka mahina ʻo Ianuali makahiki ʻumikumamāwalu kanalima.
Ma waho aʻe o kā lākou hana pū ʻana me nā ʻano kānaka kūlana kiʻekiʻe loa o nā aupuni o ko laila kapa kai, ua nanea ka hui kanaka o ke alo aliʻi i ka noho ʻana ma ʻEuropa me ke kipa pū ʻana aku i nā hale hōʻikeʻike, nā hōʻikeʻike mele, nā pāʻina a me ke kūʻai hele ʻana.
I ko lākou wā ma Palisa, i ka lā ʻumikūmāmāiwa o ka mahina ʻo Pepeluali i ka makahiki ʻumikumamāwalu kanalima, ua palapala ʻo Lot i kēia manaʻo ma kāna puke hoʻomanaʻo.
"Ma hope o ka ʻaina kakahiaka, i kēia kakahiaka, ua hele mākou i ke kūʻai hele. Ua kūʻai maila ʻo Alexander i komo no ka mōʻī wahine a me kekahi apo lima no Vikolia. Ua kūʻai maila nō hoʻi au i komo no Bernice … ʻo ia komo aʻu i kūʻai mai ai, he ʻewalu kālā ke kumu kūʻai.
Ua kākau Ke Kamāliʻi Kāne ʻo Lot i kekahi mau moʻolelo hou aku ma Palisa ma kāna puke hoʻomanaʻo. A ʻoiai ʻaʻole i palapala ʻia ke kūʻai ʻia o kēia kula pepeiao pōhaku makamae aʻiaʻi me ke kaimana i kālai ʻia, ua kū like ia mau kula pepeiao i ke kaila o nā mea hoʻonaninani kino i hana ʻia ma Palisa i ia manawa. ʻO ia paha kekahi kumu e manaʻo ʻia nei lā, ua kūʻai ʻia paha nei mau kula pepeiao ma kēia huakaʻi hele ʻana i ʻEuropa!