Nā Kiʻi o nā Mea Hoʻokumu
I ka makahiki 'umikumamāwalu kanawalukkumamāiwa, ua ho'okumu 'o Charles Reed Bishop i ka Hale Hō'ike'ike ʻo Bernice Pauahi Bīhopa no ka ho'omana'o 'ana i kāna wahine, ma hope o kona hala 'ana no nā makahiki he 'elima. 'O Bernice Pauahi Bishop ke moʻopuna wahine kuakahi a Kamehameha I a ua ili mai ka waiwai ho'oilina o kona po'e ohana ali'i ma luna ona. 'O nā mea waiwai a ke Kamāli'i Wahine Pauahi, a pēlā pū me kā Kamāli'i wahine Ruth Ke'elikōlani lāua 'o ka Mō'ī Wahine Emma, ua lilo ia mau mea makamae i mau mea e mālama 'ia ai no ka Hale Hō'ike'ike 'o Bīhopa.
Ua ho'olilo nui ʻo Charles Reed Bishop i kona manawa a me kāna pu'u kālā pono'ī me ke kāko'o pū mai 'o ka 'ohana ali'i i mea e ola mau ai ka hoʻīlina waiwai o kāna wahine. Ma o ia hana, 'a'ole nō 'o Charles Reed Bishop i nānā i ka pono o kāna wahine wale nō, akā no ka pono o ka lāhui kanaka, ko lākou loina, a me ka mo'olelo o ka Pākīpika.
No ka ho'omana'o 'ana iā Pauahi, ua noi 'o Samuel Mills Damon, ka luna waiwai o ka hale hōʻikeʻike, iā ka Federigo de Madrazo y Kuntz, he kanaka i kaulana loa i loko o ia hana he pena ki'i no ka pena 'ana i kekahi ki'i o Pauahi ma o ke ki'i i pai ʻia. Ua pa'a nō ua ki'i ala i ka pena 'ia i ka makahiki 'umikumamāwalu kanawalukumamāhiku a lawe 'ia mai i Hawai'i nei a waiho 'ia ma ka Hale Hō'ike'ike Ki'i ʻo Bīhopa ma hope o ka hemo 'ana i ka lehulehu i ka makahiki 'umikumamāwalu kanaiwakumamākahi. Ma ka 'ao'ao a'e o nei ki'i o Pauahi, ke ki'i o kāna kāne ʻo Charles, i pena ki'i 'ia e kekahi kanaka kaulana pena ki'i ʻAmelika 'o ia nō 'o William F. Cogswell. Mai ka hopena o nā makahiki 'umikumamāwalu kanaiwa a hiki i kēia manawa, ke waiho kāhelahela mau nei nō ua mau ki'i ala ma ka Hale Hō'ike'ike ʻo Bīhopa ma kahi o ka puka e komo ai 'oe i loko o nei hale.