Kiʻi Pōhaku
He kiʻi pōhaku ʻalā
Ka moku hāpapa ʻo Mokumanamana
ʻAʻole naʻe i ʻike i ka makahiki
ʻO ka pae ʻāina ʻo Hawaiʻi nei ka hui mokupuni mamao loa i nā ʻāina ʻē aʻe a pau o ka honua nei a puni. ʻOiai ua nui ka ua a me nā mea ʻē aʻe e pono ai ke ola ma nā mokupuni kiʻekiʻe o ka hikina o nei pae moku, ua ʻike ʻia nō he wahi kūpono no nā hoʻokele Polonekia nāna i hiki mua a i noho mua i ka ʻāina. No nā moku hāpapa o ke komohana aku o nei pae moku, ʻaʻole naʻe ia pēlā. No Mokumanamana kekahi o nei mau moku hāpapa, ʻaʻole lawa ka ua a ʻaʻohe hoʻi he wahi ulu lāʻau e malu ai ka ʻāina kekahi. He kanahā ʻeka ʻāina ka nui loa o nei moku hāpapa a he mau haneli nō paha kapuaʻi wale nō kona kiʻekiʻe. He ʻāina pali nō hoʻi ʻo Mokumanamana.
ʻEhiku kiʻi pōhaku mai Mokumanamana o Ka Hale Hōʻikeʻike ʻo Bīhopa. I ka nānā pono ʻana i nei mau kiʻi pōhaku, he pūʻiwa ka like ʻole o nei mau kiʻi pōhaku o Mokumanamana me nā kiʻi pōhaku o nā mokupuni nui o Hawaiʻi.
I ka manaʻo o nā kānaka ʻimi noiʻi, wahi a lākou he ʻoi aʻe ka pili o ke ʻano o nei mau pōhaku kiʻi i nā kiʻi o nā mokupuni ʻo Marqueses, ʻo ia hoʻi nā mokupuni e waiho ana ʻelua kaukani mile i ka ʻaoʻao hema o Hawaiʻi nei. Eia kekahi ʻano pilina ʻē aʻe i ko ka Polonekia waena, ʻo ia hoʻi ke kahua papa pōhaku. Kū like ke ʻano o nā kahua ma Mokumanamana i nā heiau o nā Tuamotu.