'O Manaiakalani ka makau kupaianaha o Maui,
ke kupua
Ua hana 'ia me ka lā'au, ka iwi a me ke olonā
'O ke kupua 'o Māui, ke keiki a Hina, 'o ia ke kumu hana nui o nā mo'olelo kupaianaha ma Polenekia. Ma ia mau mo'olelo he mea ho'okalakupua 'o Māui, 'o ia kai 'aihue i nā mea huna o ke ahi, a na ia ala ho'i i ho'ohei aku i ka lā a ho'omālie aku i kona holo 'ana i hiki ke malo'o mai ke kapa o kona makuahine. I loko nō o nā mo'olelo like 'ole e pili ana iā Māui, 'o ko ia ala lawai'a 'ana aku i ka 'āina, ʻo ia nō ka mo'olelo kaulana loa. Ua lohe 'ia nō ia mo'olelo like pili nō i ko Māui lawai'a 'ana i ka 'āina ma Maikonekia a me Melanikia. No ko Hawai'i mo'olelo pili iā Māui, ua kaulana kāna makau kupaianaha, 'o ia ho'i 'o Manaiakalani.
Ma ke Kumulipo i unuhi 'ia e ka mō'ī wahine Lili'uokalani, 'ōlelo 'ia e pili ana i ko Hina leo a'oa'o i kāna keiki kāne ʻo Māui.
E ki'i 'oe i kō makuakāne
Aia i laila ke aho, ka makau
'O Manaiakalani, 'o ka makau ia
'O ka lou 'ana o nā moku e hui ka moana kahiko
Huaka'i akula 'o Māui i ka lawai'a pū 'ana aku me kona mau kaikuaʻana i mea e hō'ike aku ai iā lākou lā i ka maika'i o kāna lawai'a 'ana. Ho'omākaukau akula 'o ia i kāna makau ho'okalakupua, me ka ho'ohana pū i ka 'ēheu o ka manu a Hina i maunu no kāna makau. Ha'i akula 'o Māui i kona mau kaikuaʻana me ka 'ī 'ana aku, i ka wā e ho'omaka ai kāna lawai'a 'ana aku, mai huli i hope a pau kāna hana. I ka lou 'ana aku o Māui 'o ka pa'a maila nō ia o ka ulua nui i kapa 'ia 'o Pīmoe i ka makau. Ho'oikaika aku nā kaikuaʻana o Maui i ka huki pū 'ana a 'ea maila kekahi mau māhele o ke kino o Pīmoe, me ka lilo 'emo 'ole 'ana nō ho'i i pōhaku. Ia wā, 'a'ole hiki i nā kaikuaʻana ke kaomi aku i ko lākou 'i'ini e huli a 'ike aku i kā lākou mea e huki ana a no laila huli akula lākou a i ia wā nō, 'o ka moku maila nō ia o ke aho, a huki 'ole 'ia maila ho'okahi 'āina. No ko nā kaikuaʻana huli 'ana ua mokumoku ka 'āina ho'okahi i 'ewalu 'āpana ʻāina. 'O ia mau 'āpana ʻāina nā mokupuni 'ewalu o Hawai'i nei.
No ko Māui huhū, ua kiola 'o ia i kona makau i ka lani a ma laila i lilo ai ia makau i huihui hōkū. Hiki nō ke 'ike ʻia ka huihui hōkū o ka makau o Māui i ke kau kupulau me ke kauwela nō ho'i. Kapa 'ia kēia huihui hōkū ʻo Ka Makau Nui o Māui.