Lūheʻe
ʻO nā lūheʻe nā mākau pūpū leho hoʻohana ʻia no ka lawaiʻa ʻana i ka heʻe. He pūpū leho, he kēpau, he ʻāpana lāʻau, he hao ʻoʻoi a he aho ko ka lūheʻe. Hauhoa ʻia ka pūpū leho me ke kēpau i kekahi ʻaoʻao o ka ʻāpana lāʻau a nākiʻi ʻia ka hao ʻoʻoi a paʻa ma kekahi ʻaoʻao. Hoʻopaʻa ʻia ke aho i hoʻohana ʻia no ka hoʻokuʻu ʻana i ka lūheʻe i loko o ke kai. Ke ʻike ka heʻe i ka pūpū leho, hoʻopaʻa pono kona mau ʻaweʻawe iā ia me ka manaʻo he ʻai kāna e ʻai ai.
Aia nō he mau ʻano lou like ʻole ma ka Pākīpika, a aia nō he mau moʻolelo he nui pili pū hoʻi i ke kumu e ʻiʻini ai ka heʻe i ka leho. He hōʻoia mau ka like o nei mau moʻolelo o ka Pākīpika, a pēlā e ʻohana ai ko Polenekia.
I kekahi o nā moʻolelo, nonoi akula ka ʻiole i ka heʻe e lawe iā ia i kahi mokupuni aʻe, a hiki aku i laila, e makana aku ka ʻiole i kekahi makana i ka heʻe. ʻAe mai ka heʻe e lawe aku i ka ʻiole ma luna o kona poʻo i ka mokupuni aʻe. A hiki aku i laila, lele akula ka ʻiole i ka mokupuni a haʻi akula i ka heʻe ua waiho akula ʻo ia i makana nona ma luna o kona poʻo. I ko ka heʻe hāhā ʻana ma luna o kona poʻo, ʻo kona ʻike koke akula nō ia ua hana kolohe ka ʻiole iā ia no ka mea ua waiho akula ka ʻiole i puʻu kūkae ma luna o ko ka heʻe poʻo. No laila, ke ʻike ka heʻe i ka ʻiole, ʻo kona hopu akula nō ia iā ia e kū ai ka mākaia. Ua kohu like nō ka nānā ʻana o ka lūheʻe me ke kino o ka ʻiole nāna i hana kolohe aku i ko ka heʻe kupuna i ka wā ma mua aku nei.