Lei Niho Palaoa
He hō‘ailona nui nei mau niho palaoa no nā ‘ano kānaka kūlana ali‘i no ka lāhui Hawai‘i, he mau ali‘i ia i pili ‘ohana ai i nā kānaka kūlana ki‘eki‘e o ka papa ali‘i o Hawai‘i nei.
Ho‘okohu ‘ia ka niho palaoa i kālai ‘ia me ke alelo e kīko‘o ana. He pili paha kēia i ka mana i loa‘a i nā ali‘i, ka mana ho‘i ‘o ka ‘ī ‘ana aku no kāna po‘e kānaka e ho‘omalu ‘ia ana ma lalo o kona noho ali‘i ‘ana. Pa‘a ka niho palaoa ma nā oho kapu i hilo pāwalu ‘ia a pa‘a. ‘Oiai he mana ko ka lauoho, he mana ko ke ali‘i e lei ana i ka niho palaoa a he mana ia o kona mau kūpuna ali‘i a me nā akua ho‘i.
I kēia mau lā, kapa ‘ia nā ‘ano lei like ‘ole he lei niho palaoa no kona kālai ‘ia a like loa me ka lei niho palaoa a ua lei ‘ia nō nā ‘ano kānaka kūlana ki‘eki‘e i ia ‘ano lei niho i kālai ‘ia mai ka iwi a me ke ko‘a, akā ‘o ka lei niho palaoa maoli i kālai ‘ia mai ka niho palaoa ‘o ia nō nā lei niho palaoa maoli i ho‘okapu ‘ia no ka mō‘ī.
Inā pae mai ka palaoa i uka, he hō‘ailona maika‘i ia a ho‘okapu ‘ia ia palaoa no ke ali‘i. Ua mana‘o ‘ia, ua kapu nā ‘ano kapa kai kahi ho‘i i pae mai ai nā palaoa a lilo ia mau kapa kai i mau mea e kaua ai no ka mana i hiki ke loa‘a i ke ali‘i nona ia mau kapa kai i mea ho‘i e pi‘i ai kona mana ma luna o nā ali‘i ‘ē a‘e.
Mālama ka Hale Hō‘ike‘ike ‘o Bīhopa he kanalima lei niho palaoa like ‘ole a ua lei ‘ia kekahi o nei mau lei niho palaoa e nā mō‘ī o Hawai‘i nei.