Pōhaku ku‘i palaoa
Pōhaku ku’i lā’au lapa’au
Niho ‘Elepani
Ka Ho’o’ili’ilina a ka Hale Hō’ike’ike Lāhui Hawai’i
Wahi a ka lohe, no Kamehameha ‘Ekahi kēia pōhaku ku‘i palaoa. Ua like ka nānā ‘ana o kēia pōhaku ku‘i palaoa me nā ‘ano pōhaku ku‘i ‘ai, akā na‘e, ho‘ohana ‘ia kēia pōhaku ku‘i palaoa i kālai ‘ia me ka niho ‘elepani no ka hana lā‘au lapa‘au ‘ana. Ho‘ohana ‘ia nā ‘ano lā‘au e ‘ohi ‘ia mai ke kuahiwi a me nā kai. ‘O ka i‘a, ke ko‘a, ka pūpū, ka ‘ili kumu lā‘au, nā ‘a‘a, nā hua ‘ai, a me nā liko kekahi o nā mea i ku‘i ‘ia me ka pōhaku ku‘i palaoa i mea lā‘au inu a i mea lā‘au kau nō ho‘i.
Ua hana ‘ia aku nei ka pōhaku ku‘i palaoa me ka niho ‘elepani i lawe ‘ia mai mai ka ‘āina ‘ē mai, ua ho‘ohana ‘ia nō na‘e nei pōhaku ku‘i palaoa ma kona ‘ano he mea ho‘ohana ‘ia no nā ali‘i wale nō. Ua ‘ike ‘ia, ‘o ka mana nui e pa‘a nei ma ia mea he palaoa, ‘o ia ho‘i ka mea e mana pono ai ka lā‘au lapa‘au. Ma ka ho‘omākaukau ‘ana a me ka hā‘awi ‘ana i ka lā‘au, ua maopopo nō i ke kahuna ‘o ia mea he ma‘i, he mea ‘ino na nā akua mai. A no laila, ua maka‘ala ke kahuna i ka manawa kūpono a me kahi kūpono e hā‘awi aku ai i ka lā‘au. Eia hou, ua hā‘awi pū ‘ia aku ka lā‘au me ka leo pule kūpono, a me nā mōhai e pono ai nā akua. I kekahi manawa, no nā ali‘i, ‘o ke kūkulu heiau ka mea e pono ai a e ho‘ola‘a ‘ia ai ho‘i no ia akua.