Ka Make ʻAna o Kāpena James Kuke
Ka pena ʻaila ma ka ʻāpana kapolena
Na George Carter (makahiki ʻumikumamāhiku kanakolukumamāhiku a hiki i ʻumikumamāhiku kanaiwakumamāhā)
Ma kahi o ka makahiki ʻumikumamāhiku kanawalukumamākolu
He kanaka kākau moʻolelo Pelekānia ʻo ia, a he kanaka pena kiʻi pū ʻo George Carter. Ua hānau ʻi aʻo ia ma Colchester a haʻalele pū aku ʻo ia no Lākana i kona wa ʻōpio. Ua hōʻikeʻike ʻia kāna mau kiʻi i pena ai ma ka ʻAhahui Kaha Kiʻi ma ka Royal Academy. He kanaka pena kiʻi kaulana ʻo Carter no nā kiʻi āna i kaha ai ʻo ia hoʻi ʻo Ke Kaua ma Waena o ka Mokukaua Pelekānia ʻo Quebec a me ka Moku ʻo Surveillante o ka Poʻe Palani a me Ka Make ʻana o Kāpena James Kuke. Ua paʻi hou ʻia nā kiʻi ʻelua a hoʻolilo ʻia aku i ka lehulehu.
Ua pena kiʻi ʻo Carter i ke kiʻi o Ka Make ʻana o Kāpena James Kuke ma o ke kiʻi a John Webber i kaha kiʻi ai no ko Kāpena Kuke holo moku ʻekolu ʻana a puni ʻo ka Pākīpika. He kanaka holo moku Pelekānia ʻo Kuke a he kāpena ʻo ia no ka moku mua loa o ka poʻe Haole i hiki mai i Hawaiʻi nei, a ua make ʻo ia ma muli wale nō o kekahi kuʻia ma waena o ko Hawaiʻi a me ka poʻe Pelekānia. ʻAʻole nō paha i ʻike maka ʻo Webber i ia hanana me ke kapa kai o Kaʻawaloa i ka wā i pepehi ʻia ai ʻo Kuke a make i ka lā ʻumikumamāhā o Pepeluali i ka makahiki ʻumikumamāhiku kanahikukumamāiwa. Kaha ʻia nō hoʻi ke kiʻi o ko Kāpena Kuke make ʻana e Webber ma muli o ia hanana a me nā moʻolelo āna i lohe ai mai ka poʻe i ʻike maka. Ua kaha kiʻi pū ʻia ke kiʻi o Kāpena Kuke ma o ka hoʻokomo ʻana i nā pali hāuliuli o Kealakekua i wahi e hoʻohoihoi ai i kāna kiʻi. Me ka ʻole o ia wahi, ʻo ka pālahalaha wale nō o ke kula o Kaʻawaloa ka i ʻike ʻia a he hoihoi ʻole paha ia i ka maka. Ua hōʻike pū ʻia ua ʻano kaila kiʻi ala ma hope o o kā Benjamin West kiʻi i kaha ai no Ka Hala ʻAna ʻo General Wolfe (makahiki ʻumikumamākahi kanahiku), kekahi kiʻi i pena lima ʻia e hōʻike ana i ka moʻolelo o ka poʻe o ia wā a me ke kaila o nā lole i ʻaʻahu ʻia i ia wā a ʻaʻole nō naʻe e like me nā lole o kēia au e holo nei.
ʻO kēia ʻano kaila kiʻi i paʻi ʻia, pili nō i ke ʻano kaila kaha kiʻi a Webber i hoʻolaha ʻia i loko o ka makahiki ʻumikumamāhiku kanawalukumamālua, ʻelua makahiki i kaʻahope aku ma mua o ka paʻi ʻia ʻana o ka moʻolelo holo moku o Kuke mā. Ua kaulana nō kā Webber mau kiʻi i kaha ai no Kuke, mehe mea lā, ʻo ia nō ka meʻe. Ua lilo ʻo Kuke i mea kaulana no nā kiʻi ʻē aʻe, nā ipu pālolo, a me nā kiʻi i pena ʻia e like me kā Carter mau kiʻi i pena ai no Ka Make ʻAna o Kāpena James Kuke. Ua pena hou ʻo Carter iā Kāpena Kuke no ʻekolu hou aku manawa, a ʻano like loa ia mau kiʻi me nā kiʻi i pena ʻia i ka make ʻana o Kāpena Kuke.